2 Keunenks 22
01Josia was aacht joar dou e keunenk wer. Ainendatteg joar regaaierde hai in Jeruzalem. Zien moeke haitte van Jedida, ze was n dochter van Adaja, oet Boskat.
02Hai dee wat recht is in ogen van de HEER en volgde in ales t veurbeeld van zien veurvoader David en week doar gain doembraid van òf.
03In t achtiende joar dat Josia keunenk was, stuurde hai hofschriever Safan, zeun van Asaljahu en klaainzeun van Mesullam, mit dizze opdracht noar de HEER zien tempel:
04"Goa noar hogepriester Chilkia tou en loat hom t zulver kloarleggen dat deur t volk aan tempel ofdroagen is en dat priesters dij ingang bewoaken, inbeurd hebben.
05Loat heur dat in handen geven van lu dij t opzicht hebben over t onderhold van tempel. Dij mouten t doun aan waarklu dij aan gaang binnen om minne steeën van tempel te moaken,
06de timmerlu, baauwers en mezzeloars, dat ze holt en stainblokken aanschavven kinnen om tempel op te klandern.
07Ze huiven gain rekens over te leggen veur t zulver dat ze kriegen. Dat is ja n zoak van vertraauw."
08Hogepriester Chilkia zee tegen hofschriever Safan: "Ik heb in tempel van de HEER ook n wetsrol vonden." Chilkia dee Safan t bouk en dij leesde hom.
09Safan ging weerom noar keunenk en dee verslag: "Joen knechten hebben t zulver dat in tempel was bie nkander hoald en in handen geven van lu dij t opzicht hebben over t opklandern van tempel van de HEER."
10 Dou vertelde Safan aan keunenk: "Priester Chilkia het mie ook n boukrol doan." En hai leesde keunenk der oet veur.
11 Bie t heuren van tekst van t wetbouk scheurde keunenk zien klaaier.
12 Hai bestelde priester Chilkia, Achikam, Safan zien zeun, Achbor, zeun van Micha, hofschriever Safan en Asaja, zien adjudant:
13 "Goa veur mie en t haile volk van Juda bie de HEER te roade over wat of ter te lezen staait in t bouk dat we vonden hebben. De HEER mout wel aldergloependste glìn op ons wezen omdat ons veurolders zok nait holden hebben aan wat ter in dit bouk staait en nait doan hebben wat ons aalmoal veurschreven is."
14 Priester Chilkia ging mit Achikam, Achbor, Safan en Asaja noar profetes Chulda tou, vraauw van Sallum. Sallum was n zeun van Tikwa, Charchas zien zeun. Hai ging over priesterklaaier. Ze woonde in nijbaauw van Jeruzalem. Dou ze heur t aal verteld haren,
15 zee Chulda tegen heur: "Dit zegt de HEER, de God van Israël: Zeg tegen man dij joe noar mie toustuurd het:
16 Dit zegt de HEER: Ik zel onhaail brengen over dizze stad en lu dij der wonen, krekt zo as in t bouk staait dat keunenk van Juda lezen het.
17 Omreden ze hebben mie in steek loaten en ovvers aanstoken veur aander goden en mie taargd mit aal dat spul dat ze moakt hebben. Mien gram is tegen dizze stad lösbraand en dij zel nait meer blust worden.'
18 Tegen keunenk van Juda zulm dij joe stuurd het om bie de HEER te roade te goan, mout ie zeggen: 'Dit zegt de HEER, de God van Israël: Wat woorden aanbelangt dij ie heurd hebben,
19 ie hebben joe t aantrokken, ie hebben joe klaainmoakt dou ie heurden wat ik over dizze stad en lu dij der wonen te zeggen heb dat stad n stee van ofgries en vervluiken worden zol. Omdat ie joen klaaier scheurd hebben en zo reerd hebben veur mien ogen, doarom heb ik nou ook lusterd - zegt de HEER.
20 Ie zellen staarven in vree en bie joen veurolders begroaven worden. Ie zellen nait mit aigen ogen zain huiven hou of ik onhaail over dizze stad breng.'" Dit antwoord brochten ze keunenk over.
|
